終於餵人奶餵到四個月啦！距離我‘全人奶六個月’又跨進一大步！
Daniel B，這段日子阿媽真的好辛苦呢，為堅持餵人奶都不知流過多少淚水和汗水；猶記得Daniel B出世頭幾日我尚未上奶，明明一整天Daniel B的尿片仍是‘乾爭爭’的，醫院的姑娘也說無問題，結果臨出院時才發現黃疸＋血糖低要留院照燈，那一刻阿媽實在超內疚喊足一日，嚇到醫院的姑娘以為我產後抑鬱，而跟著的一日一夜，阿媽就每四個鐘頭外賣自己一次，上兒科病房埋身餵，餵完返病房再泵，泵完食少少野攤一陣又是外賣的時候，真的是苦不堪言。
終於返到屋企啦，又繼續地獄的生涯，每隔兩至三個鐘埋身餵一次，Daniel B啜下瞓下每次餵成一個鐘，但一放落床就狂喊都唔知食左幾多，我個胸又谷到想死，結果要忍痛和阿仔分離，轉做全職泵媽；因為雖然我都是每三四個鐘要泵一次，但泵十五分鐘已夠阿仔食一餐，其餘的時間就可以用來食同瞓追奶量，但每次見到其他人可以同阿仔玩，我就被迫在睡房對著個泵，實在是悲從中來，又不知為此流了多少眼淚。
去到一個月，開始漸入佳境，我的奶量差不多可以接近全人奶，於是間中偷偷捉阿B埋身餵親子一下，想不到Daniel B大隻左啜得叻左，埋身餵半個鐘之後可以間中瞓到兩三個鐘，之後更是越餵越順暢，去到兩個月左右，不但能夠全人奶，另加早晚埋身餵，夜晚阿B甚至可以瞓足六個鐘添！
跟著阿媽開始心思思，想趁未返工前得閒Ｄ，去行下街同做運動修下身，不過出街實在無咩癮，行一陣就谷爆胸，要滾水淥腳急急趕返屋企泵奶；最慘是出街時食少一餐飲少Ｄ水，奶量就大跌，仲要出一次街連跌幾日，於是又要困在家對著個泵追奶，無哂自由真係眼淚心裡流。
三個月又有另一危機，因為奶媽放哂產假＋年假要返工啦，最大困難當然是無時間泵奶，當食飯有時只得十五分鐘倒落肚，用三十分鐘去泵奶實在是太奢侈啦；如果跟足在家的Schedule，我返工要泵三次，不過這簡直是不可能的任務，現在返工通常都只有時間泵到一次，仲要是硬下心腸掉下手頭工作咩都唔理走去泵奶；加上忙起上黎無時間飲水，可以一整天都無谷胸的感覺，奶量自然大跌，於是我開倉賑災，解凍之前儲存的冰奶比阿仔食，哪知道Daniel B好咀叼，竟然食得出冰奶同鮮奶的分別，仲要一邊食一邊喊，見到阿仔咁，人奶媽也唯有繼續死泵爛泵...
還好阿仔開始進入厭奶期，現在比我開工前足足食少兩餐，所以奶媽的產量仍勉強夠食；每天見到Daniel B精靈活潑，還有兩隻粗壯到不得了的大脾，真是覺得所有辛苦都是值得的，我要向六個月的目標繼續進發！！！
沒有留言:
張貼留言