七個月：重新開始

Daniel B五個半月時開始試粥仔，簡直是一試就愛上，仲眨下眼食成碗粥代左一餐奶，人奶媽以後就會一帆風順，哪知道食固體比食奶更加麻煩多多。

先講人奶媽，突然之間阿仔食少左奶，阿媽唯有減產；又塞又痛一大輪之後，奶量成功大跌，但Daniel B不知是否嫌出奶出得慢，又或是食得唔夠飽，就突然唔肯埋身，一埋身便喪喊；於是人奶媽唯有轉泵，但一時三刻又泵唔出，每次死泵爛泵都只出到一兩安，儲備轉眼間就食乾淨，阿仔肚餓又不斷cry cry cry真係人都癲，結果都要補左幾餐奶粉。有段時間以為‘媽記奶廠’今次一定倒閉，好彩阿媽夠勤力，天寒地涷都兩行眼淚加泵，過左成個星期奶量終於升番，阿仔亦肯再接受我啦。今次的教訓確實是十分慘痛，令我深刻地明白到，奶量這回事都是寧多勿少，儲備更是越多越好。

講番Daniel B，開始食固體後，生活作息變得亂七八糟，以前定時定侯食八安奶，現在每個‘食玩瞓’的cycle時長時短，搞左成個多月都尚未找到穩定的模式；最慘是六個多月去健康院檢查時，體重居然由五十跌去廿五的生長線，沒想過全人奶時反而會肥仔過食粥仔，沒辦法也只有聽從姑娘指示，隔日加隻蛋黃在粥仔裡。

本來一直相安無事，Daniel B亦很喜歡食蛋黃粥，只是他塊面上突然出現一大撻奶癬，初時以後是天氣乾燥，哪知道搽過五六種藥膏都沒有好轉，仲有越來越大撻的跡象，這時才開始懷疑對蛋黃敏感，停食一陣子後塊紅疹又真的慢慢減淡，無奈地Daniel B還是暫時食蔬菜粥仔算了。

另外，我也讓Daniel B試不同味道的粥仔，明顯地他對甜味的蔬菜，例如南瓜，蕃薯等極之喜歡，但對紅蘿蔔和菠菜就毫無好感；同一分量的粥，心情好的話，十五分鐘食乾淨，若沒有興趣，有時候甚至要食成個鐘，真係比佢搞到頭都暈埋。

同場加映....Daniel B對粥仔既感受...