N班讀後感

雖說讀N班並非必要，但在我們來説卻是strategic planning，因為第二個baby將會出世，屆時實在沒有足夠的人手，同時間照顧兩個幼小的baby，故需要幼稚園作為我們的托兒所。

其實我不太捨得讓只有兩歲多的Daniel B返學，故一開始決定只返上午班，感覺上好似會少D染病的機會，而且佢瞓慣自己牀仔有一大堆honey同darling公仔同被仔陪瞓，我擔心佢係學校唔適應瞓唔着仲麻煩。

 

開學的過程初頭好像很順利，Daniel B完全無喊過，又話返學好開心;不過返學的影響慢慢開始浮現，首先是作息被打亂，平日每天都是中午十二點準時食午飯，愛吃如命的Daniel B只要遲少少吃都已經嘈嘈閉，但返學之後要成一點幾至返到屋企，初時Daniel B簡直是餓到癲左勁發脾氣，但因為佢坐校巴，放學中途又沒辦法比佢食D野，實在是挨了好耐才慢慢適應得到。

 

另外就是唔肯瞓午覺，沒想過只是幾小時的課程，玩下遊戲唱下歌仔食下點心啫，卻原來對一個兩歲的小朋友來說，都是非常的刺激。隨着唔肯午睡，跟著便是太疲累然後扭計唔合作唔食野發脾氣，連夜晚都開始發惡夢慘叫，自理能力亦差左，明明一向喜歡自己行，可能見到其他小朋友有樣學樣於是不斷扭抱，連戒左片都無啦啦賴番尿，那一陣子實在是湊到人都癲。

 

最麻煩是返學了一陣子，Daniel B就開始流鼻水，之後長期鼻下都掛著兩行鼻涕，有時食左藥會好少少，過幾日又再流過，間中又有幾聲咳同痰，幸好暫時都是發燒過兩次，幼稚園的病菌確實是非常厲害。

 

雖說有許多不良的影響，但其實全都是正常的返學反應，而且Daniel B慢慢都適應得到，逐漸回復舊日善良可愛既baby;最開心是，Daniel B説話能力高左好多，之前我們都是估估下佢講咩，但現在佢已經能夠清楚表達自己既需要，能夠多些了解佢既所思所想，實在令人感覺十分幸福。

 

有時Daniel B連一些複雜的詞語都講得到，例如對住個六角形大叫hexagon，又會講P for Penguin，放學時亦會帶些非常精緻的美勞作品回家，絕對比我同年紀時懂得多好多，已經令我感到喜出望外，那幾千元的N班學費總算沒有白交。每次一想到，他兩歲多就已經要開展以後廿多年的返學生涯，便覺得忐忑不安，但每早見到他帶着燦爛的笑容蹦蹦跳地上學去，實在希望他以後都能夠如此快樂開心地去學習。