砂煲兄弟

公眾假期仍要上班，忙碌完一輪想食餐好些少的，見這間新開餐廳名字和裝潢幾特別，於是決定入內一試。

坐低望餐牌時有些愕然，因為最便宜的煲仔飯都要$60起仲未加一，當附近餐廳的套餐都是$50左右，仲要包湯包飲品包小食，這間餐廳的定價確實是相當進取。

考慮好一會，最後我點了個<海南雞煲仔飯>，好肚餓但等左至少十五分鐘，煲仔飯連醬汁才送上。飯煲份量比我預期中少，雞肉下面亦有不少醃菜墊底，另外，盛載飯餸的並非傳統的砂煲，而是超熱的鋼煲又只有小小的手柄，進食的時候必須要小心翼翼。

味道方面卻又很不錯，雞塊肉質嫩滑，去骨得很乾淨，啖啖肉令人食得很放心，夾着香葱和炸蒜同吃非常惹味，雞油飯亦很夠味，再配上醃菜完全不用另加豉油已是非常可口，只是煲仔飯的靈魂--飯焦欠奉，應該是鋼煲傳熱太快，飯粒成為飯焦前已陣亡成飯炭，見到煲底黏着層厚厚烏黑的飯炭，實在令人好無奈。

整體上，這裡的煲仔飯在賣相，味道，份量各方面，都沒有特別過人之處，但價錢在荃灣區卻是偏貴，上菜速度亦太慢，確實沒有讓人再幫襯的意欲。