十八個月的Daniel B

佢個遊戲室越來越大…我地個廳就越來越細…唉…T_T…

‘今日唔知聽日事’，絕對是這段期間的最佳寫照。

 

可能是我太天真了吧，以後Daniel B越長大，生活習慣會越來越有規律，情緒會越來越穩定，又會學懂更多的知識和技能；雖說是明顯地見到Daniel B一日比一日有進步，不過間中又會在某方面倒退一下，例如明明每晚會乖乖地九點上床瞓覺的，有幾晚會突然喪喊要人陪瞓，陪住佢佢又好興奮唔肯瞓，結果要陪成個鐘才肯倦極暈倒；但隔了幾晚，又突然很順攤地肯自己瞓，放佢落床仔跟著講句‘ bye’，蓋被時完全毫無反抗，然後我們就能夠高速熄燈離開，實在令人鬆一口氣。

生活習慣在這幾個月內大部份時間都算是predictable，七點半鐘起床飲杯奶，九點鐘食碗生果麥皮做早餐，十二點食午飯，之後午睡兩點至四點半，起身再食一個生果，跟著七點食晚飯，九點就上床瞓豬豬。

食飯方面，之前我覺得佢簡直是天下無敵，十五分鐘鯨吞一大碗飯連餸，現在每次都要睇心情，快的時候都是十五分鐘完成，但心情唔好不在狀態時，可以扭計扭足成個鐘，期間要氹要傾計仲要不斷唱歌娛樂佢，才食得大半碗；而且有些食物例如大眼雞魚，一向都是佢瘋狂地喜愛的，但又突然會很討厭地一啖都唔肯食，有時真的唔知佢想點。　

Gross motor現在除了識行識跑外，居然仲識雙腳原地jump！雖然可能只是跳起幾毫米，但已經足以令大家驚嘆不已！另外亦非常喜歡上樓梯，不過大膽地上完後又會好淆底，會不斷慘叫我們抱番佢落黎。最近又突然愛上‘聞歌起舞’，一聽到音樂會立刻放下手頭的玩具，雙手揮舞踏踏腳搖搖搖，間中還要轉個身，十分可愛。

出牙持續緩慢，不過都終於見到第八隻門牙啦！下排左邊亦有少許出大牙的現象，以前Daniel B從來都唔食手指的，但最近除了不斷流口水，有時甚至成隻手塞哂入口，看來這情況尚要持續好一段日子…

語言能力繼續提升，最近甚至開始識講詞語啦！包括‘擺落去’，‘走左’，‘Tom-Ma’（佢最鐘意的Thomas火車），尋日更字正腔圓地不斷講‘麥兜’（！），現在很期待Daniel B能完全用語言和我們溝通的時候，讓我們能更加了解佢的內心世界。

身體方面，剛剛去健康院磅重，11.1KG！第一次升上75 percentile，簡直是Daniel B人生的最高峰！上個月Daniel B才剛剛病好，發燒幾日跟著退燒幾日又再燒過，唔肯食野又勁脾氣，仲要不斷流住兩行鼻水流足成個星期，最後都要出動抗生素才搞掂。其實佢少少頭暈身慶擦損瘀傷我都已心痛到不得了，佢每次病我簡直是勁緊張又擔心，結果之後自己都病倒了；作為阿媽，我實在要學懂放鬆和堅強一點呢！這樣才可以成為Daniel B的支柱！