不倒翁中日火鍋料理

想不到去年年底試完這間<不倒翁中日火鍋料理>之後，今年就沒膽子再外出打邊爐了，唯有睇下相寫下食評回味下。

當晚七時左右去到餐廳時，以為是旺場時間但居然客人不多，我們兩個人被安排坐四人坐位，所以十分寬敞舒適。

點好菜後，便送上各款醬料讓我們自行'混醬'，我通常只是簡單地，加些葱花和蒜粒在豉油裡，以免掩蓋食材的鮮味。

不過先來的'花甲海鮮湯底'的味道實在是超清淡，初時都要點些豉油加味，內裡海鮮都新鮮但花甲就比較細隻，

另外招牌四寶丸，除鯪魚球加左陳皮味道特別些外，其他都好一般，

日式野菜籃就正常新鮮，

水餃皇我們點半份，來到變一份，八隻如果我們兩個人分，實在太飽會吃不下其他菜式，四隻份量就剛好，但味道沒太大特色，

手切肥牛脊位是全晚最出色的配料，具口感又有肉味，肉質嫩滑但又並非和牛那種入口即溶，有些後悔沒有點大份，

羊肉丸羶味夠濃，放進火鍋後好快浮面以為食得，但原來要煮好耐才熟，

西瓜汁清甜好飲，但好多泡亦唔夠涷，好像飲要很久才能飲得到底層的果汁，

最後加左個田雞件，等了許久原來是即點即劏，味道確實好鮮甜，但上桌前灑了些鹽令肉塊不斷抖震，感覺十分恐怖，我只能閉眼，並盡速將所有田雞件放進煲內煮熟'止震'。

兩個人食左差不多$1200都幾貴，因為之前剛在台灣試過<無老鍋>，相比之下<不倒翁>價錢貴兩三倍，但味道只是一般，服務又普通，找尋侍應經常有難度，又落錯單落漏單，雖然食材都很新鮮，但以這價錢，應該可以有更好的選擇。