水舞間

是次澳門兩日一夜之行，我們除了不斷咁食之外，還有重頭戲──水舞間。想不到‘水舞間’公演了一年多，仍是長做長有，不斷有捧場客，我們是個多月前預定package的，也只剩下最貴的門票；幸好總算物有所值，景觀非常之正中，而且最重要是絕對不會濕身，我覺得中價票還可以，但最便宜的門劵盡可能都不要買，尤其是頭一兩行的觀眾，因為即使有齊雨衣雨傘，開場不久已見到他們全身濕透，要像醃咸魚般捱到完場都幾辛苦。

開show前大家都一直猜測，究竟個水池有幾深呢？不過當這巨型鐵棚架升起，特技演員開始表演高台跳水的時候，大家都望到目瞪口呆，真係好深好多水呀！

至於故事內容方面，都是老老土土的英雄拯救美人諸如此類，但我覺得情節較為鬆散和混亂，睇得不是太明白，一出場的漁夫由頭帶到尾但又不是主角，期間亦不斷有壞蛋出現，中間又無厘頭加插一段電單飛車表演，確實令人摸不著頭腦。

不過整體而言，‘水舞間’ 是娛樂性豐富的，場面亦十分震撼刺激，燈光服飾舞蹈等等也很華麗漂亮，雖然未至於是人生必看的表演，但如果去澳門旅遊的話，順道也是值得一看既！