教你挑選理想幼稚園

前幾天，我和J媽兩個怪獸家長，一齊去聽＜教你挑選理想幼稚園＞的講座。

我剛剛從星加坡旅行回來，仍在執拾行李屋企七國咁亂，J媽也是放工飯都唔食匆忙趕去，大家都是緊張baby的前途，雖然非常眼瞓疲累，但仍強撐精神完成這三個小時的講座。

只不過是‘挑選幼稚園’，已經是一門博大精深的學問，要先了解不同幼稚園的教學模式，再因應baby的性格和能力作出配對，然後更要重點訓練baby的面試技巧，還要學整profile及撰寫自薦信；入幼稚園已經要搞成咁，遲Ｄ點忙到baby入大學呀？？？

其實聽完這個講座，我對如何揀幼稚園仍是非常迷茫，都唔明白幼稚園點解可以有十一種教學方式（角落教學，蒙特梭利，單元主題，語文教學，方案教學，傳統教學，多元智能，文化教學，高廣度，螺旋式，ＩＢ），呢Ｄ學名已足夠我聽到一頭霧水，還要考慮幼稚園的地點，環境，教學資源，師資，校長等等等等；不過難度最高的是要了解Daniel B是何類型的baby（阿仔究竟你是視覺型，聽覺型定手動觸覺型呀？？？），即使找到100%的完美配對學校，也要同一大班龍年的超大Ｂ爭位，同時就算訓練到Daniel B十八般武藝，亦控制不到佢的臨場表現；結果我的‘挑選理想幼稚園’策略，仍是大包圍報多幾間，阿仔你入唔入到Ｎ班就睇你自己的造化啦！