我們先嘗試刺激感較低的<急轉雙轉梯>和<旋風雙轉梯>，未玩之前好驚，不斷問工作人員恐唔恐怖，答案當然是千篇一律唔恐怖架唔驚架，但玩完之後又真係好興奮，立刻跑上去再玩多次。這兩條滑梯可以一個人或兩個人一齊玩，黄色的好多轉彎，橙色的速度較快。
跟著玩<八彩天梯>，在外面經過時，見中途垂直的斜度已經覺得好得人驚，還要扒在滑墊上向前衝，可以和其他人一起鬥快，當其他人衝哂落去之後，我發現自己扒在墊上之後就郁唔到，要工作人員推我落去，所以我一定會包尾。落去初時轉彎速度不快，但見到陽光那一刻，就知道會垂直急跌落去，水花又會噴到成面都係都好刺激。
之後再繼續行上去玩<神秘迷沖>，可以四個人一齊玩，滑梯內黑漆漆速度勁快，不斷向落俯衝我只能瘋狂尖叫。尖叫到有些頭痛想休息下，但小兒又立刻話要玩<急流旋渦>，這個要有足夠體重才可以玩，我唯有繼續捨命陪玩，今次就狂轉到有些頭暈想嘔。
已經好暈但再被捉去玩恐怖級的U型<沖天瀑布>，可以最多六個人一齊玩，我們見前面班大隻佬總共380kg，落去時剷到上淺黄區，跟著就聽到佢地既慘叫聲，而我地四個加埋只有190kg，工作人員姐姐安慰我們體重好輕啫唔會上到好高架，於是好安心地坐上氣墊，點知衝落去之後就見到我地都上到淺黄區我心知不秒，跟著我仲發現自己由向前衝轉左背脊落，於是無奈地接受現實，慘叫着向後跌返落去簡直是十級恐怖，有一刻其實我係有被拋離墊，跟著我唯有死命拉著扶手，繼續尖叫我倒轉左呀我好驚呀直到旅程完結。
沒有留言:
張貼留言